Odisseya filmining kassa yig'imlari 700 million dollardan ortdi

Kristofer Nolanning "Odisseya" filmi dunyo bo‘ylab 700 million dollarlik daromad marrasidan oshib, jami 727,9 million dollar yig‘di. OAV ma'lumotlariga ko‘ra, film bu natijaga prokatning 13-kunidayoq erishgan.

Shimoliy Amerikada Gomer dostoni asosida suratga olingan ushbu film 320,5 million dollar, xalqaro bozorlarda esa 407,4 million dollar daromad keltirdi. Bundan tashqari, film 14-avgustdan boshlab dunyoning ikkinchi eng yirik kinobozori hisoblangan Xitoyda ham namoyish etila boshlaydi.

Yaqin kunlarda "Odisseya" 2026-yilda bir milliard dollarlik daromadga erishgan filmlar qatoriga qo‘shilishi kutilmoqda. Hozircha bu ro‘yxatdan "O‘yinchoqlar tarixi 5", "Super Mario: Galaktika" va Maykl Jekson hayotiga bag‘ishlangan "Maykl" filmlari joy olgan. Filmning Rossiyadagi norasmiy namoyishlari esa 30-iyuldan boshlanadi.

Filmda Mett Deymon, Enn Xeteuey, Tom Holland, Robert Pattinson, Zendeya va Sharliz Teron kabi mashhur aktyorlar rol ijro etgan. Kartinaning byudjeti 250 million dollarni tashkil etgan bo‘lsa, Universal studiyasi marketing kampaniyasiga qo‘shimcha ravishda yana 125 million dollar sarflagan.