Ukrainada "Qizaloq va Maymoq" multfilmi nega taqiqlandi?

Ukraina prezidenti Vladimir Zelenskiy Rossiyaning mashhur “Qizaloq va Maymoq” multfilmi yaratuvchilariga qarshi sanksiyalar joriy etdi.

Tegishli farmon 20-avgust kuni Ukraina prezidenti rasmiy saytida e’lon qilindi.

Cheklovlar multfilmni yaratgan “Animakkord” studiyasi hamda u bilan bog‘liq besh nafar rossiyalik shaxsga nisbatan qo‘llanildi. Ular orasida studiya asoschisi va bosh direktori, ssenariy muallifi, hammuallif hamda multfilm huquqlarining egasi ham bor.

Ukraina Milliy xavfsizlik va mudofaa kengashi bayonotiga ko‘ra, “Qizaloq va Maymoq” bolalar uchun mo‘ljallangan ko‘ngilochar kontent niqobi ostida rossiyaparast narrativlarni targ‘ib qilishi mumkin. Shu sababli loyiha Ukraina milliy xavfsizligiga tahdid sifatida baholangan.

Multfilm boshqa mamlakatlarda ham bahs-munozaralarga sabab bo‘lgan.

Iyul oyida bir guruh britaniyalik siyosatchilar mamlakat madaniyat vaziriga ochiq xat yo‘llab, multfilmni striming platformalaridan olib tashlashni talab qilgan edi. Ular multfilmda targ‘ibot elementlari mavjudligini ta’kidlashgan.

Bundan avval, iyun oyida Estoniya tashqi ishlar vaziri Margus Tsaxkna ham multfilmni “Kreml yumshoq kuchining bir qismi” deb atagan. Uning fikricha, bolalar uchun yaratilgan ko‘ngilochar kontent orqali kremlparast va militaristik g‘oyalar singdirilishi, shuningdek, Rossiyaning agressiyasi va imperialistik ambitsiyalari odatiy holat sifatida ko‘rsatilishi mumkin.