“Oppog‘oy” 2025 filmi remeyki IMDb va Disney tarixidagi yomon filmmi?

Uzoq kutilgan “Oppog‘oy” remeyki 21-mart kuni bo‘lib o‘tgan premyeradan so‘ng tanqidchilar tomonidan maqtalgan bo‘lsa-da, tomoshabinlarning e’tirofiga sazovor bo‘lmadi. Mashhur IMDb reyting platformasida uning reytingi 10 balldan atigi 1,6 ballni tashkil etmoqda (xabar yozilgan vaqtda 188 ming nafar ovoz yig‘ilgan).

Bu IMDb tarixidagi eng past natijalardan biri hisoblanadi, garchi film hozircha rasmiy anti-reyting loyihalar ro‘yxatiga kiritilmagan. Shunga qaramay, agar joriy baholar inobatga olinsa, “Oppog‘oy” eng yomon filmlar orasida 8-o‘rinni egallashi mumkin.

Ko‘pgina foydalanuvchilar filmga atigi bitta yulduz qo‘ygan, va aksincha, 4,7 ming tomoshabin “Oppog‘oy”ni yuqori baholab, 10 ballga baholagan.

Shuningdek, yangi “Oppog‘oy” Disney filmlari reytingida ham rekord darajadagi past ko‘rsatkichni qayd etdi — ilgari studiyaga tegishli hech qaysi remeyk bunday past baho olmagan. Eslatib o‘tamiz, ertak filmning byudjeti 250 million dollar deb baholanmoqda.

Syujet haqida

Film klassik “Oppog‘oy va yetti gnom” ertagidan ilhomlangan bo‘lsa-da, ba’zi asosiy elementlar o‘zgartirilgan. Oppog‘oy qahramoni avvalgidek bechora malika emas, balki mustaqil va jasur qahramon sifatida tasvirlangan. U o‘z taqdirini o‘zi belgilashga harakat qiladi.

Yetti gnom o‘rniga filmda boshqa turdagi personajlar aks etgan. Bu o‘zgarish film e’lon qilingandan beri eng ko‘p tanqid qilingan jihatlardan biri bo‘ldi. Yovuz qirolicha esa avvalgidek go‘zallikka tashna va Oppog‘oyni yo‘q qilishga harakat qiladi. Biroq bu versiyada uning motivlari yanada kengroq yoritilgan.

Film feministik va zamonaviy g‘oyalarni ilgari surishga uringan bo‘lsa-da, tomoshabinlarning aksariyati bu o‘zgarishlarni iliq kutib olmadi. Ko‘pchilik an’anaviy ertakning o‘zgarib ketganidan norozi bo‘lib, remeykni keskin tanqid qilmoqda.